اسانوں کے پتہ کیہڑی مسجد تے کیہہ کلیسے تے کیہڑے مندر،
اساں محبت دی "م" کڈھ کے تے "ح" نوں دے کے تے "د" لا کے خدا احمد دی حمد کیتی
اساں تاں پکھواں نوں پیار کیتا
اساں تاں جنگلاں نوں سینے لایا
اساں تاں دریا دا گھٹ چا بھریا
اساں تاں ریتاں تے سجدے کیتے
اساں نہ ڈٹھا اساں نہ سنڑیاں اساں نہ بولے
اساں مریجے اساں کٹیجے
اساڈیاں ہڈیاں دا سرمہ بنڑ کے ہوا دی اکھ اچ پویندا وتیا
اسانوں کے پتہ کونڑ نیوٹن تے کیہڑے حرکت دے فارمولے
اسانوں پتہ اے جوں سدھا ونجڑائے نیو کے ٹرنائے تے اکھ نئیں پٹنڑیں
اسانوں کے پتہ ریڈ بلڈ سیل وغیرہ کے ہے
اسانوں پتہ اے جوں خون رتا اے تے اتنا رتا اے جوں تیرے ہتھاں تے مہندی لگسی
اسانوں پتہ اے جوں فیثا غورث ترے بدن دے ریاضیاتی اصول بالکل سمجھ نہیں سگیا
تیرے بدن دے تاں زاویے مستطیلاں قوساں مثلثاں بئے جہان دیاں ہن
اسانوں پتہ اے جوں صرف توں ہیں
اسانوں پتہ اے جہان دھوں ہیں
اسانوں پتہ اے جوں کائناتاں دا روگ کیویں مکاونڑاں ہے
اسانوں پتہ اے جوں توں اداس ہیں تے تینوں کیویں ہساونڑاں ہے